वेरूळ-अजिंठा आंतरराष्ट्रीय महोत्सव

मटा ऑनलाइन | Updated:Oct 8, 2016

वेरूळ-अजिंठा आंतरराष्ट्रीय महोत्सवात संगीतकार अजय-अतुल, अभिनेता मकरंद अनासपुरे, अभिनेत्री सोनाली कुलकर्णी आणि गायिका श्रेया घोषालचे आकर्षण आहे. दरम्यान, महोत्सवाच्या निमित्ताने चिकलठाणा परिसरात असलेल्या कलाग्राम येथे या काळात स्थानिक कला गुणांना संधी देण्यासाठी दिवसभर सं‌गीत, नृत्य, गायन, वादन कार्यक्रमांचे आयोजन केले आहे.


असे आहेत कार्यक्रम
१४ ऑक्टोबरः (स्थळ–वेरूळ लेणी समोर) कार्यक्रमाच्या उद्घाटनानंतर पार्वती दत्ता (वेरूळ नृत्य दर्शन), पूर्णाश्री राऊत (ओडीसी नृत्य), सानिया पाटणकर (शास्‍त्रीय गायन), पंडित उद्धव आपेगावकर व बर्ड कार्नलीस (सितार व मृदुंग जुगलबंदी), यास्मीन सिंह (कथ्थक), ग्रेसी सिंग (शिवशक्ती नृत्य) यांचे सादरीकरण होणार आहे.

१५ ऑक्टोबरः (स्थळ – सोनेरी महल, औरंगाबाद) – या दिवशी प्रसिद्ध संगीतकार अजय – अतुल यांचे कॉन्सर्ट आहे. यामध्ये श्रेया घोषाल, कुणाल गांजावाला, अभिजित सावंत, ऋषिकेश रानडे, योगिता गोडबोले, प्रियंका बर्वे, स्वरुप खान, सोनाली कुलकर्णी व मकरंद अनासपुरे सहभागी होणार आहे.
१६ ऑक्टोबरः (स्थळ – सोनेरी महल, औरंगाबाद) – या दिवशी गायक अदनान सामी व कनिका कपूर यांच्या गायनाचा कार्यक्रम तिस्का चोप्रा सूत्रसंचालन करणार आहे.

पाच वर्षांच्या तारखा निश्चित
‘गेल्या काही वर्षांपासून विविध कारणांमुळे महोत्सव रद्द होत आहे. ऐतिहासिक औरंगाबाद शहरात महोत्सवाचे सातत्य रहावे तसेच रसिकांना नोंद घेता यावी यासाठी महोत्सवाच्या अखेरच्या दिवशी पुढील पाच वर्षांच्या तारखा निश्चित करण्यात येणार आहेत. पुढील वर्षी वेरूळ येथे २ दिवस कार्यकम घेण्याचे नियोजन असून अजिंठा येथेही महोत्सवाचे कार्यक्रम घेऊन महोत्सवाचा सप्ताह घेण्याचा विचार सुरू आहे,’ असे डॉ. उमाकांत दांगट यांनी सांगितले.